اتعودت من زمان اسمع الأخبار من راديو بي بي سي ومونت كارلو وكنت تقريبا بشغلهم طوال فترة تواجدى فى البيت وفى مرة من المرات كان فى حلقة عن التدوين ومواقع التواصل الاجتماعى، وعلى الفور عملت اكاونت على تويتر وفيس بوك وعملت مدونة باسمى على بلوجر..
وبما انى مصرى الفيس بوك اكتر حاجة شدتنى
وبما انى بتاع مشاكل دورت على صفحات وجروبات سياسية
وبدأت اتعرف على ناس عندهم نفس افكارى ونفس توجهى وده كان شىء رائع بالنسبالى وطريقة اقدر اعيش بيها بعيد عن الواقع العشوائى الجاهلى اللى فى مصر.
قدام عينى عدى الفيس بوك بمراحل كتير كان احلى مرحلة فيهم قبل ثورة يناير
مكانش اى حد كده يعرف الفيس بوك ومعظم المشاركين عليه افكارهم وتوجهاتهم منفتحة وافكارهم بناءة
فى الثورة بدأ الفيس بوك يشتهر بين الشباب وخصوصا كانت الفضايح فيه للركب :D
اما دلوقتى وده سبب كتابتى للتدوينة
الفيس بوك بقى مصطبة فى كفر أبو معزة
اى حد بيقول اى حاجة
يعنى تبقى انت باحث فى موضوع وقريت كتب واحصائيات وترجمت مقالات ولما تكتب عنه بوست يطلعلك واحد مجهول الهوية يقولك انت جاهل او يعلق على كل المشاركين فى البوست انهم اغبياء وجهلة ومبيفهموش وهوا اساسا حيوان
معندوش مخ ولا مطلع ولا عارف حاجة غير معلومة ملوثة وموجهة جايبها من طرف ما !!
تدخل على صفحات الاخبار كلها شتايم .. كلها
واحيانا خناقات ملهاش علاقة بموضوع الخبر!!
وكل الناس بتقول على كل الناس مش فاهمين وكل واحد عامل نفسه فاهم تكلمه فى الدين يعمل عليك شيخ شيوخ الازهر تكلمه فى السياسة يعمل فيها هيكل تكلمه فى القضية الفلسطينية يعمل فيها ابوعمار!!
لو بنت حطت صورة تلاقى جالها 1000 لايك حتى لو وحشة ولا شكلها يغم !!
لو ولد وبنت كتبوا نفس البوست البنت تجيب 100 لايك والولد ممكن يجيب لايك ولا اتنين !!!
وبكده اكد المصريين ان وجودهم فى اى مكان عار على المكان نفسه، ومن متابعتى للفيس بوك اتأكدت ان مصر عمرها ما هتتغير طول ما الناس جهلة ومسيطر عليهم غرائزهم ومدعين!! مدعين معرفة ومدعين دين ومدعين طب وسياسة
شعب كذاب ونصاب بطبعه
ودلوقتى اتأكدت من مقولة سعد باشا زغلول لما قال ان مفيش فايده :\، فعلا مفيش فايدة والعيب فى التعليم احنا محتاجين تعليم واخلاق وضمير.
شعب كذاب ونصاب بطبعه
ودلوقتى اتأكدت من مقولة سعد باشا زغلول لما قال ان مفيش فايده :\، فعلا مفيش فايدة والعيب فى التعليم احنا محتاجين تعليم واخلاق وضمير.
