بالمصرى

حاسين ان احنا ملناش لزمة فى مصر مهملين ،حاسين ان احنا غير الناس اللى بتحكمنا ،مفيش حد بيفكر فينا مش قادرين نعمل حاجة مسلوبين الارادة ،ابن الظابط ظابط وابن المستشار مستشار وابن ريس ريس واحنا ولاد مين

،ولاد مصر ملهومش لزمة
حاسين بألم فى صدورنا ،حاسين باضطهاد فى بلدنا ،الكبير بيكبر والصغير بيصغر واحنا مش عارفين هنكمل ازاى ،هوا الموضوع موضوع فلوس وبس لو كده يبقى عليه العوض ومنه لعوض،بن لادن ارهابى وصدام حسين دبحوه فى العيد وعبد الناصر بيتهاجم كل يوم فى الجرايد اللى المفروض انها تعبر عن رأى الناس ،الحكومة بتطلع فى التليفزيون بيتكلموا ويقولوا مفيش مشاكل فى حاجة كأنهم بيتكلموا عن سويسرا مثلا مش عارف الناس دى بيستخفوا بعقول الناس ولا بيطلعولنا لسانهم وبيقولولنا ولسه،طيب مين هينقذنا مين هيخلينا ناخد حقنا طيب امتى معرفش ؟ كل حاجة بايظة مبقاش في حاجة اساسا طيب نسافر نروح فين يا ترى هنلاقى حد يحترمنا بره مصر ،اكيد لأ واسأل مجرب وده لأن مفيش حد بيحترمنا هنا وفى الاخر مفيش حاجة نقولها الا ربنا على الظالم.